曼城勢取10連勝 般尼等炒

猪拉多纳

曼城近排發晒癲狂追榜首車路士，今場返到自己地頭對住作客例腳軟嘅般尼，梗係要大開殺戒啦！佢哋只要今仗贏波，就可締造10連捷打破球隊紀錄，因此整定般尼唔好彩，讓球主勝捧得過。

（now 622周日晚11時直播）

曼城近期好消息接踵而來，先有門神赫特續約，日前又傳王牌射手阿古路有望1月10日復出鬥愛華頓，而借將林柏特更有可能効力到2月中。即使隊中有高柏尼、迪斯高、阿古路等主力要養傷，祖維迪又唔知出唔出到，但曼城兵源充足，尤其係中場核心大衞施華復出後重拾佳態，入波助攻瓣瓣有，即使打無鋒陣，拆禮物日喺作客加埋雪戰咁不利條件下都轟入西布朗3粒，返到主場攞士哥更加No Problem啦！
一為紀錄二為追車

般尼相隔4季後重上英超，但冇錢增兵，根本唔夠班，主場出戰都還好，但作客想爆冷就真係零機會，佢哋防守特曳，近6次作客有5場係失咗兩球或以上。

更何況「藍月亮」已經喺各項賽事連贏9場，追平球隊史上最長連勝紀錄，有指曼徹斯特市天氣OK冇雪落，只要今場再贏埋10連勝即破紀錄，而且依家只係落後榜首車路士3分，因此對住弱過藥煲嘅般尼絕對係大炒格，讓兩球都未驚過啦！