阿德添食追殺鳳凰

猪拉多纳

重上勝軌信心返晒嚟

澳職今日上演獨腳戲，由阿德萊德聯主場對威靈頓鳳凰。「阿德」早前忙於應付澳足盃決賽，令成績有點反覆，但近仗已重上勝軌，面對有主力射手尼敦般斯缺陣且作客戰績一般嘅鳳凰，相信有力再贏一場，主W可說不二之選，進取嘅可捧埋讓球主勝。

（有線64及203台周三下午4時30分直播）

阿德萊德聯上仗作客大炒FC悉尼3球，成功終止聯賽二連敗，同時克服咗之前出戰澳足盃決賽嘅疲累。阿德萊德聯今仗雖有多名主力缺陣，包括後衞泰歷艾列治及保加特停賽，中場卡路斯卡、奧沙麥馬歷及後衞法比奧費拉拿因傷踢唔到，而門將加利高域則要代表澳洲出戰亞洲盃，但球隊陣容龐大，即使出副選亦有入球保證。況且阿德萊德聯近五次主場迎戰鳳凰皆獲勝，加上上仗贏波增添信心，今午之戰有望再贏一仗。
鳳凰士哥王踢國際賽缺陣

鳳凰上輪主場擊敗西悉尼流浪者錄得5仗不敗，呢支新西蘭球隊狀態大勇已經殺到上第4位。鳳凰今季踢咗12場轟入22球，當中以前鋒尼敦般斯射入當中嘅10球最搶鏡，可惜佢同樣要踢亞洲盃，所以嚟緊兩場缺陣，對球隊嚟講係好沉重嘅打擊。同時，鳳凰今季作客南澳洲球隊戰績差勁，無論去到阿德萊德定係墨爾本都係輸多贏少，今仗更缺少埋主力射手尼敦般斯，相信更難有作為，阿謙睇好阿德萊德聯今仗可輕勝對手，主W及讓球主勝皆值得捧場。