AC還拖做大戲

猪拉多纳

至於喺杜拜表演賽「打斷」皇馬22連勝走勢嘅AC米蘭，原來只係發咗場美夢，意甲歇冬後首仗，AC喺主場領先下反輸畀薩斯索羅。慶幸會方仲有些少雄心，早前簽下馬體會翼鋒阿利斯奧施斯。呢位意大利國腳今晚意甲倒戈作客拖連奴，應該可以大派用場，問題係AC防線太不濟，寧揀入球大。

（TVB 301周日凌晨3時45分直播）
阿利斯奧施斯倒戈啱使

講波前同大家講段花邊新聞，踢過AC嘅伊巴謙莫域，無厘頭送維他命丸畀舊隊友阿比迪當聖誕禮物，原來條友做咗代言人，唔怪得啦。講番場波，AC送走費蘭度托利斯，換來阿利斯奧施斯，除笨有精，因為教練恩沙基慣用3前鋒，阿利斯奧施斯正好填補右翼空缺，令進攻路數更全面。呢位27歲快翼今季去西甲搵食前，正係拖連奴主力，但未獲馬體會重用，回流意甲當然要證明身價。阿利斯奧施斯上仗後備上陣，冇乜發揮機會，預料恩沙基今仗會畀佢擔正，佢對拖連奴虛實瞭如指掌，絕對係AC一大殺着。

拖連奴主場表現一向唔錯，對住費倫天拿、國際米蘭都唔使輸，早前仲贏埋前列嘅熱拿亞。佢哋過去遇上AC都踢得好放，近6次交鋒4次開大盤，包括3次主場，同AC總共炮製14個入球，大盤有2.2倍值博。