肥賓盃賽醒神拿玻里-1穩陣

猪拉多纳

今晚阿King睇中意大利盃16強獨腳戲，由衞冕嘅拿玻里主場鬥烏甸尼斯，前者射手希古恩話明冇打算離隊，有助穩定軍心，主帥賓尼迪斯向來係「盃賽專家」，對住近況曳爆嘅烏甸尼斯，直取讓球主勝。

（now 633周五凌晨4時直播）

拿玻里今季風雨飄搖，聯賽一度跌落中游，早前盛傳「小煙槍」希古恩下屆冇歐聯踢就走，好彩日前聯賽靠佢入波勇挫拉素，令拿玻里反壓對手升上第3位，呢位阿根廷射手入波後表明喺拿玻里好開心，冇打算離隊，絕對有助穩定軍心。

拿玻里教頭賓尼迪斯一向帶隊踢盃賽特別醒神，上屆已經稱霸意盃，上年年尾又力克祖雲達斯攞到意超盃，而且球隊投資唔少，點都要有盃落袋作交代；對手烏甸尼斯近12場正式賽事贏得1場咁大把，個勢咁頹難望反彈，拿玻里有力輕鬆晉級，讓球主勝咪錯過。
西維爾唔齊腳難贏愛奴

至於法足盃32強雷恩主場對蘭斯，蘭斯作客技勝一籌嘅雷恩冇運行，主勝穩開（TVB 302周五凌晨4時直播）。最後西盃8強首回合愛斯賓奴主場火併西維爾，後者有中場基斯度科路、後衞巴里查及泰莫連拿斯因傷缺陣，中場麥比亞又要出征非國盃，愛斯賓奴有力先拔頭籌，受讓平半捧下盤。

（now 632及TVB 13周五清晨5時直播）