巴塞半場大起潛艇

猪拉多纳

紅爆尼馬傾好續約

雖然美斯仍然係「巴塞球王」，不過巴塞隆拿近排最Hit嘅球員肯定係尼馬，呢位「巴西球王」今季大爆發，一共為巴塞出戰25場入咗21球，上場西班牙盃8強次回合更靠佢發威搞掂馬體會嘅爛仔足球。尼馬咁鬼死弗，今場巴塞返到主場對住「黃色潛艇」維拉利爾，有望半場就數對手幾粒，1.88倍嘅半場大捧得過！

（now 632周一凌晨4時直播）

「新比利」尼馬上季喺巴塞長期活喺美斯嘅陰影下，但經過一季嘅適應期同擺脫傷患後，「新比利」今季勁搶鏡，就好似對上兩場佢一共入咗4球，美斯嘅風頭完全畀佢搶晒。
碧基囝囝極速賣身

近日有西班牙報章更指佢已經同巴塞傾好續約一事，將續約至2020年，更重要係年薪會加到1200萬歐元（約1.05億港元），僅次美斯。「新比利」依家順風順水，「黃色潛艇」有難嘞！

其實巴塞隊中人逢喜事精神爽嘅又點止尼馬一個，碧基日前再做老竇，幫二仔改名做薩沙（Sasha），更極速將囝囝「賣身」巴塞，出世一日後就將佢註冊成為巴塞會員。
維拉利爾後防失猛將

巴塞近7場全勝，成班球員都愈踢愈起勁，雖然維拉利爾近況亦不俗，但呢場作客巴塞先係球隊真正嘅考驗。「黃色潛艇」最近將後防猛將基比爾包列斯達賣畀阿仙奴，近兩場對利雲特同基達菲，睇落冇咗佢，喺防守上都冇乜大問題，兩場都冇失波。不過今場對手係巴塞喎，擁有美斯、蘇亞雷斯同尼馬嘅「MSN」鋒線，冇咗包列斯達嘅「黃色潛艇」今場好大機會現形，半場就畀巴塞玩殘，半場大有望！