博利好落5班泥料

不死鸟

一次過有5匹自購馬登場，好在暑期做晒功課，不用臨急抱佛腳。二班1200米，「搖滾雄豐」響法國兩勝表列賽，膠沙及草地各一場，始終係純美國種馬，感覺上泥地本領較高；「真心」在紐跑開1400、1600米慣性跟前，性能一如同母兄長「得寶飛駒」，初出1200米熱身格。三班1200米，「福勝滿載」響澳洲昆士蘭一戰即勝，細場必可勝任，月中試谷閘掄元，為日後渡江發展鋪路；另一組「新蝦王」在紐兩戰一勝，初出已贏70分讓磅賽，落敗一役為二級賽，反映上手自視甚高，初出可留意走勢。三班1400米，「財駿福星」在紐7戰最差第五，但要到第六仗1600米才開齋，睇片匹馬大步靠檻，跑長好過跑短，而且一直戴開眼罩或面箍上陣，脾氣未馴適應需時。
「博利好」老豆係El Moxie，同系「名店之星」、「勝利飛駒」、「年年開心」及「皇龍飛駒」統統贏過泥地，過往6試泥閘兩度掄元，另四次都在前五名而返，認定泥地乃最佳出路，落五班可破釜沉舟。