大進外地試閘醒

不死鸟

第一場第4班1200米。告東尼馬房的「松林之星」上仗季內初出跑第三，不敵頭馬「駕寶」及亞軍馬「高風格」，再睇回頭馬「駕寶」再出再贏，而第二名的「高風格」再出亦補中，顯見「松林之星」輸畀兩匹高質馬得第三敗不足辱，而牠拚後態況勇進，今次再跑回勝途，強手已去，亦輪到牠贏馬添進帳。「沙貝利」上仗初出落敗輸狀態不足所致，熱身後火氣冒升，質素不弱馬，發揮水準穩位望贏。
第二場4班1000米。「雙辣」來港後連場搏殺未得逞，主因馬匹情緒波動，陣上跑來時好時劣，可能心理內在問題影響，但經過年長後，心理成熟躍進有大幅改善，再加上練者賀賢重新打磨，將其口勁收斂，日前快跳走來不搶口可印證，論馬居四班不蝕底，今次柏寶壓陣，人強馬勇當可一嘗頭馬滋味。「大進」來港後練者方嘉柏勤操打磨勇熟俱進，外地3試大閘得1冠1亞顯示速度不俗，今次操足出爭短途，有力一出即食。
第三場第4班1600米。「不言而喻」4歲仔踏入今季明顯成熟更進，睇回上場贏來胸有成竹可印證，贏馬加7分仍留四班作戰惡氣未減，乘勝追擊力足再下一城。「利之寶」剛戰贏來輕鬆足證態況全面復甦，復課勇況依然，升班負輕磅施突襲有力爭雄。
第四場第5班1800米。「活威小子」上仗爭1600米得第四，頭馬由韋達息息相關?「利之寶」取勝，副車身份有此表現可收貨，亦反映此駒狀態來得早，長途馬開氣後火氣冒升，有力贏馬補中。
「尖子」剛戰後追走勢出色，再用蔡明紹操刀，擺明車馬再拚，態況不俗馬可與前駒一決雌雄。