銀河2.04倍上盤伐木

猪拉多纳

美職 7:00 （日）60 波特蘭伐木者 Vs 洛杉磯銀河

洛杉磯銀河鋒線今季雖然冇咗當路雲，好在仲有愛爾蘭射手羅比堅尼攻堅，適逢呢位前鋒近排想傾續約，聽朝銀河造訪中場天殘地缺嘅波特蘭伐木者，肯定加多兩錢肉緊數胡，銀河讓平半一於撐2.04倍上盤。

（開賽時間：周一早上7:00）
羅比堅尼要博表現

銀河喺今季聯賽首戰以2:0輕取芝加哥火燄，老牌射手羅比堅尼寶刀未老攻入第2球鎖定勝局，佢前排接受愛爾蘭電視台訪問時，強調仲好享受為銀河踢波嘅日子，暗示想續長約留效，相信佢會力爭續約本錢，今仗唔使驚呢位射手唔搏命啦！

對手波特蘭伐木者首戰和波表現唔算差，可惜今戰佢哋條中場線依然缺少華拿里、韋爾莊臣、施曼斯基等主力，戰力大打折扣，今鋪惡鬥銀河受讓都捧唔過。