深宵大格鬥

猪拉多纳

喪攻天鵝撞正 弗爆紅軍

今夜英超獨腳戲，「天鵝」史雲斯主場激戰利物浦，雖然球迷要凌晨4點起身睇波好辛苦，不過大家唔睇實走寶，因為呢兩隊近年對賽例牌開大，咁多波入唔睇堅嘥喎！史雲斯冇咗當家射手韋菲特邦尼但繼續玩喪攻，而且Keep到高入球率，「南韓謝拉特」奇誠庸同基菲爾施古臣近期愈戰愈強，至於紅軍就有個「謝拉特接班人」佐敦軒達臣持續弗爆，兩軍相遇肯定火花四濺，既然話到明今晚呢場係入球騷，冇理由唔玩埋大盤吓話？

（now 621周二凌晨4時直播）
神軒奇誠庸孭重飛

利物浦今場有隊長謝拉特傷愈復出，不過以紅軍近期嘅強勢，相信領隊羅渣士都會以不變應萬變，將謝老四擺住喺後備席，繼續用佐敦軒達臣同祖阿倫喺中場拍住上，24歲嘅軒達臣依家大熟大勇，以往喺謝拉特身邊多數都係做一啲「髒活」，但自從謝拉特因傷長抖後，近7場坐正做隊長嘅軒達臣正式升呢做咗「神軒」，發揮其精準長傳能力，頻頻交出助攻，仲逐漸練成謝拉特式嘅遠射，對上兩場英超對曼城同般尼都射入靚波，「謝拉特接班人」呢個位佢已經坐硬。「神軒」上季都試過面對史雲斯省入兩粒，幫紅軍贏4比3，以佢依家嘅勇態，今場有望重溫好夢喎！

利物浦有個「謝拉特接班人」，主隊嘅史雲斯都有個「南韓謝拉特」，中場大將奇誠庸亦係全能型中場，効力些路迪期間就有傳紅軍想羅致佢，但結果畀史雲斯捷足先登。呢位韓國型男最近大爆發，近5場攻入3球，配合舒維爾、基菲爾施古臣等攻擊球員，彌補咗失去韋菲特邦尼嘅戰鬥力。
近5對戰多波入到癲

翻查往績，史雲斯近5次對住利物浦全部開大，其中4場總入球更係入到4球或以上，真係多波入到癲，估計今場兩軍唔會保守，史雲斯主場出擊當然唔會腳軟，而力爭前4嘅紅軍亦渴望攞晒3分，鬥攻之下一於追多鋪大啦！