新星華拉堤爭上位 意大利外圍賽有保證

猪拉多纳

意大利多年嚟都係靠派路派牌撐起隊波，但呢位35歲中場總會有退落嚟嘅一日。適逢今仗佢缺陣，令小將馬高華拉堤有望喺呢場指揮官考牌戰上位，咁梗係搏到盡啦！加上意軍喺外圍賽向來發揮穩定，今場作客由經驗尚淺嘅新帥比迪夫領軍嘅保加利亞，有力全取3分，意軍讓半一撐上盤。（有線64及203、中央5台周日凌晨3:45直播）
保加利亞靠意乙老將孭飛

意大利由領隊干地上任後銳意改革，不時挑選新兵入伍考察，但表現亦冇走樣，喺H組錄得3勝1和佳績，咁對辦干地自然更放心畀機會年輕球員。佢賽前講明今仗係馬高華拉堤上位機會，呢位22歲中場仲唔做齣好戲咩？

事實上華拉堤早前喺歐聯16強兩回合，協助巴黎聖日耳門淘汰車路士備受讚賞。佢唔止護波出色，而且傳送毒辣，難怪令人對佢寄予厚望，難得佢仲話唔怕有壓力，會盡力做好自己本分。況且意大利喺06年9月輸過畀法國後，打後24場歐國盃外圍賽不敗，若然加埋世盃外圍賽，不敗場數更多達44場，想呢支外圍賽之王突然失準斷纜真係天方夜譚。

主隊保加利亞近年冇乜新星夠料擔大旗，前線仲係靠老將保積洛夫同艾夫連波波夫搵食。其中前者霉到連意甲球隊都唔肯收留，要去意乙特拉納落班。更攞命係新帥比迪夫經驗不足，只喺國內同塞浦路斯等小國教過波，未見過大場面，想喺自己國家隊首戰有作為都幾難咯！
Data King：意大利歐國外24場不敗

‧雙方近6次交手，意大利取得4勝2和。

‧意軍自干地領軍後取得5勝1和。

‧意大利連續24場歐國盃外圍賽不敗。