水晶宮西布朗做大騷

猪拉多纳

成日都話歐聯好難估，去到淘汰賽階段變數更多，剛過去嘅8強首回合，第1日兩場（馬體會對皇馬、祖記對摩納哥）夾埋入得1粒咁大把，當你以為大家小心翼翼之際，次日（波圖對拜仁、聖日耳門對巴塞）嚟個「華麗轉身」合共炮製8球，反差極大。由於嚟緊周中就要打次回合，這些心繫歐聯嘅球隊，好似聖日耳門咁，又要爭取衞冕聯賽而搏命，但歐聯落後巴塞兩球，係咪需要留力呢？究竟佢哋會用乜嘢心態同人腳去應付今輪聯賽，肥叔自問摸唔透，都係避之則吉。

撇除呢啲有歐聯負擔嘅球隊，查實周末仲有好多波玩，今日重心推介場次，就係英超水晶宮主場對西布朗，後者嘅護級形勢水深火熱，今仗為搶分必豁出去進攻，主帥佩尼斯對舊東家水晶宮熟到爛，加上水軍冇乜護級壓力，領隊柏杜又好「大」喜「攻」，隨時同西布朗鬥攻，入球大乃不二之選。

（now 624周六晚10時直播）