水晶宮冇嘢爭Hea踢 車仔捧盃P派W

猪拉多纳

英超話咁快就殺到入大直路，一放絕塵嘅車路士基本上已經揸住半隻冠軍盃耳，只要今晚喺史丹福橋砌低水晶宮，就可以提早封王兼重奪失落4季嘅英超錦標！水晶宮上咗岸冇戰意可言，相信由出爐英格蘭球員先生夏薩特孭飛嘅「藍戰士」可以大開殺戒，1.88倍「讓球主勝」梗係要捧場啦！

「車路士啲波好鬼悶」、「悶蛋車路士」，相信大家都成日聽到球迷用呢兩句說話嚟形容佢哋，小妹亦唔否認車仔啲波係悶蛋，「泊大巴」兼穩守突擊確係幾冇癮，不過話時話，要贏波最緊要實際，車路士今季攻守兼備嘅表現，係抵捧盃嘅。
寸王訓話有料到 半場反勝李城

領隊莫連奴嘅戰術同策略堅有料到，上場對住近排取得4連勝嘅李斯特城先失1球，但「寸王」半場休息嗰陣同班球員訓話後，下半場隊波好似脫胎換骨一樣，狂攻射入3球反敗為勝。雖然主力射手迪亞高哥斯達受傷繼續缺陣，莫帥亦話如果球隊提早奪標，「迪哥」亦會收咧休養，但車路士有夏薩特、奧斯卡杜斯山度士同杜奧巴等攻擊好手壓陣，邊使愁冇波入吖。
水晶宮等抖暑2連敗

作客嘅水晶宮早排係咁踢好波，大炒過新特蘭之餘，仲試過爆冷擊敗曼城添。不過咁，季尾波最講鬥志，呢支倫敦球隊家陣上咗岸無欲無求，最近班球員明顯抱住等放假心態Hea踢，近期對住西布朗同侯城輸晒並分別吞兩蛋，戰意有幾曳唔需要多講，點睇都唔似阻到「藍戰士」開奪冠Party囉！
Data King：車仔主場近期旺細

‧以2.5球中位數計，車路士近9戰主場8場開細。

‧雙方近14次聯賽碰頭，車路士取得9勝4和1負。

‧水晶宮今季17場英超作客開出13次「半場和」。
乜都玩錦囊：水晶宮半場硬淨敲半和

水晶宮今季英超作客半場表現硬淨，17戰淨係落後過1次咁多，雖然要佢哋打破車路士今季聯賽主場半場不敗似乎難啲，但相信水晶宮有力半場頂住車仔進襲，2.4倍「半和」咪錯過。
盤路解碼

車仔今季英超主場半場不敗，16戰開出10次「半主」及6次「半和」。