巴塞MSN弗爆 「-3」照炒皇蘇

猪拉多纳

「西甲一哥」巴塞隆拿周中歐聯4強首回合踢出漂亮一仗，將「地上最強」個招牌擦到立立令，連德甲盟主拜仁慕尼黑都吞3蛋收場，氣勢勁到冇朋友！今晚返到西甲主場撲擊由「莫天才」莫耶斯領軍嘅皇家蘇斯達，以巴塞現時嘅強勢，隨時大炒報番首循環一敗之辱，讓3球都照捧2.05倍「讓主」。

（now632台及TVB13周日凌晨0:00直播）

美斯對拜仁一仗梅開二度兼交出一個助攻，盡顯球王本色，將謝路美保定舞到趴街嗰球更加精彩，以美斯依家嘅狀態，全世界應該都冇人可以Mark得住佢！巴塞目前喺西甲畀皇家馬德里力追，最後3場唔可以有任何閃失，不過有連續3仗梅開二度嘅美斯，仲邊會甩拖呀？
近9場喪入28球

一個美斯已經令人頭痕，最慘仲要對埋尼馬同蘇亞雷斯，呢個「MSN」組合近期進入瘋狂狀態，3個頂尖射手最近9場加埋喪入28球，巴塞亦連續7場比賽贏對手兩球或以上，班波狀態弗到咁，皇蘇後防有難咯！

係！皇蘇首循環主場確實贏過「地上最強」1:0，但入嗰球只係靠佐迪艾巴擺老烏，不過今時唔同往日喇，皇蘇今次作客魯營無欲無求，歐洲賽唔使諗、降班唔使愁，對住聯賽冠軍就在眼前嘅巴塞，淨係戰意都輸幾條街啦， 加上皇蘇近7仗只得1勝，狀態麻麻，無理由唔要巴塞要皇蘇啫！