安歷基帶出現代足球精髓

猪拉多纳

今屆歐聯決賽戲碼終於塵埃落定，由祖雲達斯硬撼巴塞。祖記一向以防守見稱，後面有門神保方「保住後方」，亦有傳球大師派路處理死球，前面仲有西班牙新星艾華路莫拉達及時「兩弒舊主」，眾志成城下氣走衞冕嘅皇馬。巴塞自今季由安歷基接手後，與之前哥迪奧拿領軍時極度重視控球嘅打法截然不同，尤其是前面淨係留番「MSN」美斯、蘇亞雷斯、尼馬爭取士哥就夠，因此4強對拜仁嗰陣，唔介意對方強調控球同橫傳，安帥就以簡單直接嘅快速反擊迎敵，並且刻意加強死球戰術嘅運用，實在係踢出咗現代足球嘅精髓。
阿仙奴作客曼聯唔使輸

好似英超嘅阿仙奴主帥雲格都崇尚進攻，但好多時都總係守唔住勝果，好彩自上年年尾收番借將高基連後，多咗呢位踢法硬淨嘅防中助陣，隊波立即有前有後，攻守兼備，經過今年一輪連勝後，依家喺聯賽「坐三望二」添。今晚英超阿仙奴作客「四哥」曼聯，為免要踢歐聯附加賽，相信雲格都想球隊保住第3，因此Peter認為兵工廠今仗坐和望贏。
金句：入波係靠直線嘅南至北，而非橫傳東到西