希古恩被嘲唔找數 拿玻里猛火炒「塞」搞大騷

猪拉多纳

意甲今晚有兩場直播睇，拿玻里喺尾場主場對切塞納，就算開到3.5球都要揀1.85倍入球大。雖然拿玻里有教練賓尼迪斯停賽，唔能夠喺場邊督師，不過射手希古恩唔肯為歐霸盃出局而「找數」退役，睇怕勁入波整番場大騷，塞住批評者把口至得！

（TVB301周二凌晨3:00直播）

拿玻里喺上輪聯賽只能作客2:2打和帕爾馬，賓尼迪斯同希古恩仲躁晒被控行為不檢，除咗肥賓被罰停賽，希古恩亦被罰款11,000歐元（約9.7萬港元）。不過賓尼迪斯近排唔知做乜成為搶手貨，甚至癲到話皇馬都想搵佢接掌，就算佢唔可以喺場邊督師，睇怕都會落柯打踢場爭氣波，為自己鋪定後路！
切塞納篤定降班

仲有呀，射手希古恩賽前話入唔到歐霸盃決賽就退役，結果佢哋喺4強被迪尼普踢出局後，網民就笑佢吹水唔「找數」，睇怕佢今場要入多啲波，轉移一眾批評者嘅視線。何況呢班波仲要搶分爭下屆歐聯席位，對住連續10場不勝，篤定降班嘅切塞納，唔數等幾時先？