獅吼大顯身手氹新帥

猪拉多纳

西甲維拉利爾繼續澳洲之旅，上次驚險擊敗阿德萊德聯，今日下晝再鬥布里斯班獅吼。從上仗所見，維拉利爾整體水平明顯比起澳職球隊高一班，不過戰意略為鬆散。獅吼教練艾萊斯新官上任三把火，球員為保飯碗肯定搏到盡，再追大盤啱數。

（有線64及203台周三下午5時直播）
維拉利爾防線鬆散

維拉利爾上場對阿德萊德聯先失兩球，然後末段發力連追三球反敗為勝，印證咗咩叫「唔見棺材唔流眼淚」，前線除有墨西哥前鋒杜斯山度士掛帥，後備上陣嘅阿根廷前鋒韋圖交出一入波一助攻亦盡顯個人級數，只係擔心防線會像去仗般有甩漏情況，再有失波唔出奇。

布里斯班獅吼上周宣布由前澳洲國腳艾萊斯擔任新教練，雖然佢未正式領軍，但佢透露睇埋今場之後便會展開組軍工作，球員想留低或受重用一定要證明自身價值。艾萊斯職業生涯曾經喺西班牙搵食，踢過奧沙辛拿、艾拉維斯，對西甲球隊有一定認識，隨時搵到破關之法，預計戰況會同上場對阿德萊德聯差唔多，一於再捧大盤。