地上最強有買趁祖

猪拉多纳

MSN無堅不摧

今屆歐聯決賽祖雲達斯同巴塞隆拿喺柏林嘅奧林匹克球場交鋒，名副其實係王者之戰，雙方今季已各自奪得本土聯賽及盃賽冠軍，換言之今場勝方就會成為「三冠王」！講到級數，西甲及西盃盟主巴塞始終高一班，「MSN」美斯、蘇亞雷斯、尼馬無堅不摧，勢必佔上風。祖記焗住主守，但球員年齡偏高，恐怕招架唔住對手狂攻，巴塞讓半一，照要上盤。

「地上最強」巴塞今季橫掃西班牙球壇，皆因「MSN」實在太超班，3人各項賽合共轟入120球，成為西班牙史上最強鋒線組合。球王美斯季尾愈戰愈勇，近3仗入5球，其中西班牙盃決賽，個人表演由中場開始盤球，扭過畢爾包4位球員射入，呢種「屈機式」踢法，任何對手都無法防範。淨係一個美斯已經有能力將對手玩弄於股掌之中，更何況巴塞仲有能傳擅射嘅蘇亞雷斯、尼馬，以及「後上殺手」恩尼斯達，進攻點極多，就算祖雲達斯嘅意式防守再穩固，恐怕都係抵擋唔住。
祖雲達斯老化輸體力

至於意甲及意大利盃冠軍祖雲達斯能夠淘汰另一西甲豪門皇家馬德里，好大程度因為對手處於低潮，當時嘅「銀河艦隊」唔可以同依家如日中天嘅巴塞相提並論。祖記仲有一大弱點，就係球員年齡偏大，泰維斯、艾拉都年過30，派路更加已經36歲，經過一個球季惡戰後，呢班老將體力難免比較輸蝕。更加唔好彩係中堅基亞連尼日前操練時受傷，無緣再鬥蘇亞雷斯，預料會由巴沙利頂替佢嘅位置。不過呢位34歲老將今季備受傷患困擾，剛傷愈冇幾耐，狀態成疑，一下子就要應付「MSN」，真係頂唔順，門將保方今幾難保住後方，都唔知要執幾多次波出來。