阿根廷半場KO 巴拉圭

猪拉多纳

美洲國家盃奪標大熱門阿根廷明早登場，將喺B組首輪迎戰巴拉圭。「潘帕斯雄鷹」有球王美斯壓陣，對今屆美洲盃可以話係志在必得，佢同「好巴打」阿古路合拍到暈，加上喺曼聯失意嘅「天使」迪馬利亞亦想藉今次賽事重振雄風，今次誓要炸爆今非昔比嘅巴拉圭打響頭炮，阿謙睇好阿根廷半場就「KO」對手，一於捧半場主勝。

（now 681周日清晨5時30分直播）

外界成日覺得美斯喺巴塞隆拿踢得好過阿根廷，啱啱先幫「地上最強」榮膺三冠王，但佢近年喺「潘帕斯雄鷹」嘅表現已有改善，上年仲帶領阿根廷事隔24年殺入世界盃決賽，可惜加時飲恨屈居亞軍。其實，唔計非大國腳嘅世青盃同奧運，阿根廷一隊自1993年贏得美洲盃後，已未曾再嘗大賽冠軍嘅滋味，美斯今次誓要協助國家隊捧走今屆美洲盃，結束長達22年嘅錦標荒。
阿帥馬天奴「倒戈」有計

美斯狀態有幾弗唔使多講，佢嘅好拍檔阿古路同樣着晒火，呢位曼城射手剛季轟入26球首度奪得英超金靴獎，日前熱身賽喺美斯未歸隊下擔大旗更大演「帽子戲法」，狂數玻利維亞5比0，真係勒都勒唔住，拍埋同佢勁夾嘅美斯只能用如魚得水嚟形容。至於另一隊友迪馬利亞亦喺嗰場波梅開二度，呢位上季喺曼聯迷失嘅「天使」，同樣希望藉住美洲盃挽回聲譽，肯定加多兩錢肉緊踢好波。

巴拉圭雖然係上屆美洲盃亞軍，但自主帥馬天奴離隊後表現每況愈下，唔單止未能殺入上年世界盃決賽周，近9仗更只係贏得一場咁大把，以往固若金湯嘅防守蕩然無存，進攻仲要靠過晒氣嘅希度華迪斯同巴里奧斯，正宗係攻不銳守不穩。而且最重要係馬天奴上年接替沙貝拉成為阿根廷領隊，今場就會掉轉槍頭，佢對舊東家實力瞭如指掌，實諗到大把破敵計仔，巴拉圭今仗都係等炒，隨時半場都頂唔住，一於捧阿根廷半場勝。