小森巴霸氣食塞

猪拉多纳

爭第6冠睇齊阿根廷

喺新西蘭舉行嘅世青盃終於嚟到決賽，由巴西U20對塞爾維亞U20。「小森巴」4強大炒塞內加爾5比0輕鬆晉級，盡顯霸氣，呢支5屆冠軍只要捧盃就可同死敵阿根廷睇齊，成為奪冠次數最多嘅球隊，意義重大。塞爾維亞U20進入淘汰賽後，3戰都踢足120分鐘，恐怕已搏到殘，頂唔住巴西火力，受讓平半都冇着數，力撐巴西U20上盤。

（周六下午1時開賽）

巴西分組賽3戰全勝轟入9球，16強及8強遇上兩支爭標熱門烏拉圭同葡萄牙，雖然兩場都冇波入，但仍憑互射12碼晉級，連幸運之神都企喺「小森巴」呢邊。巴西捱過最艱難兩場硬仗後，前路變得好平坦，4強大勝塞內加爾5粒，上半場已領先4球鎖定勝局，下半場慳番唔少體力，對準備今仗終極之戰絕對有幫助。
塞爾維亞連場加時搏殘

巴西攻擊點多，陣中已有9位球員取得入球，中場7號仔馬高斯古靴美上仗梅開二度，狀態弗到爆。唔好忘記仲有一班已赴歐洲搵食嘅新星，包括曼聯中場安達斯彭利拿、馬賽中場阿利夫、布拉加中場丹尼路巴保沙及皇馬前鋒真恩卡路士等，人腳強橫好有冠軍相。

唔計1987年前南斯拉夫，塞爾維亞只係首次殺入世青盃決賽，好大程度上因為晉級過程對手較弱，但3場淘汰賽對住匈牙利、美國及馬里都要踢到加時，贏得非常吃力，領隊柏奴域都好坦白，話擔心球員體力有問題。以塞爾維亞主守踢法，唔夠體力影響更加大，今場對住巴西一旦先失波，恐怕冇力翻身，一於撐「小森巴」成為今屆王者。