日本女足撻唔着玩細啱數

猪拉多纳

女子世盃16強壓軸戰聽朝上演，衞冕冠軍嘅日本女足對荷蘭女足，追1.55倍入球細比較實際。雖然日本女足喺分組賽3戰全勝，但感覺上完全撻唔着，特別係上屆最佳球員澤穗希進攻能力大減，撞啱荷蘭女足連續3場分組賽開細，睇怕都好難開入球騷咯。（中央5台周三早上10:00直播）
荷蘭穩陣行先

日本女足日前以1:0砌低厄瓜多爾女足，對住魚腩只係僅勝1球，捧場客真係睇到嘔血，但其實佢哋已經排出強陣應戰，教頭佐佐則夫賽後更加苦笑話，並冇專登留力，而且上屆攻入5球、成為神射手兼最佳球員嘅王牌澤穗希踢足全場都冇波入，證明36歲嘅佢進攻能力差咗好多。事實上，日本女足前鋒安藤梢喺首戰傷出後已經返國療養，秘密武器岩渕真奈又受傷患困擾影響狀態，的確唔容易入波。

另邊廂嘅荷蘭女足，日前以1:1逼和東道主加拿大女足，連續3場開入球細，加上門將基杜特絲上場已經傷愈復出把關，相信心態上會更加穩字行頭，唔似會被大炒。