颶風隊恰新芝加哥未夠班

猪拉多纳

周六晚有成90幾場波，花多眼亂下阿King決定集中研究聽朝嘅阿甲賽事。新芝加哥今季聯賽仲未開齋，球隊似乎唔係好夠班踢阿甲，今仗對手颶風隊話晒識贏波，新芝加哥縱有主場之利相信都好難攞到甜頭，阿King捧颶風隊贏波。（周日凌晨2時開賽）
主隊新升班19輪未開齋

今季新升班嘅新芝加哥，一路踢落都唔係咁掂，唔少球評家都指呢班波冇足夠實力應付阿甲賽事，所以踢到第19輪都未試過贏波嘅滋味。新芝加哥近期主場表現雖有起色，但今仗有中場主將加施辛尼因上仗攞紅牌而停賽，而另一中場基斯甸高美斯繼續因膝部十字韌帶有傷而缺陣，更大問題係呢班波近11場波只得入得1球咁大把，攻力疲弱下今仗難對颶風隊構成威脅。颶風隊近期表現有番啲起色，近7場聯賽只係輸過1場咁大把，而且球隊入球能力唔錯，前線好似基斯頓艾斯賓路沙、托拉沙同阿班拿近期成日有波入，始終對手新芝加哥嘅入球能力麻麻，作客嘅颶風隊今仗有力贏波而回，捧客勝。

其他賽事方面，葛度爾古斯近四仗主場未輸過，今仗雖有前鋒謝美艾奧維停賽，但面對近期入得又失得，加上有中場沙治奧域陀停賽嘅班菲特，相信入波唔會少，一於捧大盤。（周日凌晨3時開賽）至於阿度斯維主場對高隆嘅賽事，兩隊近況都麻麻，阿度斯維嘅中場安祖戴亞斯今仗停賽，前鋒羅渣馬天尼斯同高隆後衞基文迪洛迪古斯皆有傷上陣成疑，實力受削下兩隊今仗都會踢得保守，一於捧半場和。（周日凌晨4時10分開賽）