首都打吡撐馬體會

猪拉多纳

今晚西甲爆發首都打吡，馬德里體育會主場硬撼皇家馬德里。兩軍勢成水火，今場唔使講打甩髀，全面復甦嘅馬體會「王子」費蘭度托利斯，力爭喺死敵身上取得個人為「床單兵團」正式比賽第100個士哥，況且皇馬喺近10次交手贏得1場，擺明畀人食住憑乜嘢讓波呀？馬體會讓球勝咪錯過。

（now 632周一凌晨2時30分直播）

馬德里打吡屬全歐最火爆打吡之一，雙方仇深似海，每次碰頭都飛沙劈石，上季季中「愛回家」重返馬體會嘅費托重拾佳態，今季已經入咗兩球，僅次於着晒火嘅拍檔基沙文成為「床單兵團」次席射手。如果「王子」今仗披甲的話，將會踏入個人第200場西甲嘅里程碑，計埋其他盃賽，費托目前為馬體會於正式比賽累積99個入波，假如佢今仗用第100個士哥擊殺同市死敵，就更加有意義，預計「王子」必定搏甩髀。

當然皇馬亦唔係善男信女，今季開咧後8仗正式比賽未輸過兼贏咗6場，C朗剛於歐聯對馬模取得職業生涯第501個入波。
銀河艦隊近4造訪1球不入

不過「銀河艦隊」近年對親硬淨嘅馬體會都冇啖好食，睇番雙方之前10次正面交鋒，單計法定時間戰果，皇馬只錄得1勝5和4負，近4次造訪卡達朗球場更1球不入，包括上季聯賽慘吞4蛋，全面處於下風。

事實皇馬幾個中場如莫迪歷及卻奧斯等踢法偏柔，撞正馬體會班「悍匪」好似堤亞高文迪斯、基比等，唔畀人食住先奇。雖然皇馬有沙治奧拉莫斯同加里夫巴利傷愈復出，但狀態唔慌弗，而且比比、占士洛迪古斯及丹尼路雷斯仲未好番，實畀「床單兵團」嘅瘋搶戰術打到失晒魂，今場梗係揀受讓嘅馬體會。