中央陸軍霸氣搶Ｗ

猪拉多纳

主場迎擊烏拉爾

好消息，球彩台今個星期開始會直播「俄羅斯超級聯賽」（俄超）！響鑼鼓第一場，梗係要整場班霸播吓啦！今晚7點食晚飯時間，冠軍大熱莫斯科中央陸軍會出擊迎戰依家聯賽排行第六嘅烏拉爾。雖然烏拉爾近況唔錯，不過「中央陸軍」依家係榜首「一哥」，一班球員弗到漏，前線一對「非洲雙煞」威力十足，大門仲有「鋼龍」艾堅菲夫把守添，實力真係超班！預計今場佢哋可以輕輕鬆鬆開主Win咯！

（有線64及203周六晚7:00直播）

俄羅斯班霸莫斯科中央陸軍今季猛虎出柙，開季到依家踢咗11場聯賽，9勝2和未輸過，教練施盧斯基更加被俄羅斯足總請去兼埋教國家隊。啱啱完咗嗰輪「歐洲國家盃外圍賽」，俄羅斯連贏兩場順利出線，大軍當中就有六位係「中央陸軍」，包括攞到職業生涯230場不失球嘅門神艾堅菲夫。「中央陸軍」有「俄羅斯國腳」做主力之餘，亦有「多產」外援，射手阿密特穆沙同杜姆比亞狀態大勇，呢啤非洲兵喺近3場聯賽各自貢獻3個入球，認真犀利。
烏拉爾近績佳係假象

烏拉爾雖然喺近6場聯賽得3勝3和，表現同走勢都唔錯，不過睇真啲，其實全部對手都係聯賽中、下游球隊，相反之前2場對住前列分子莫斯科火車頭同上屆冠軍辛尼特就完全唔夠打，分別輸1:3同1:4！前車可鑑，今場作客如日方中嘅「阿一」「中央陸軍」，財力同戰力都遠遠唔及主隊，更加唔使旨意會有奇迹啦！