3戰不勝被批冇鬥志

猪拉多纳

大宮松鼠玩夠主場反彈

大宮松鼠响日乙一直領放，堪稱今季最有條件玩嘢嘅球隊，事實佢哋亦久唔久嚟一手，但係今日佢哋主場對住德島漩渦，礙於有班擁躉目及住，唔敢玩得太離譜，1.53倍主Ｗ可以話好穩陣。

（開賽時間：周日下午3:00）

大宮目前以9分拋離磐田山葉，聯賽仲剩低6輪，日乙冠軍就攞梗o架嘞，問題係佢哋想幾時捧盃啫。原本有日本傳媒計過數，只要大宮上星期鋤低熊本羅亞素，今日場波好可能成為佢哋封王嘅加冕大典，點不知大宮夠膽死作客輸0:3，令所有人跌晒眼鏡，同時令日乙錦標睇落去好似仲有得爭咁。

其實大宮今季就係咁，擺明揀波嚟輸，呢一季佢哋聯賽主場只輸過畀櫻花同綠茵，作客就衰咗5場，但係5場敗仗入面，只得櫻花、綠茵勉強算得係佢哋嘅爭標對手，不過實際上當時呢兩隊同大宮有好大積分差距，對佢哋威脅最大嘅磐田、福岡兩隊，就主場都贏唔到大宮，顯而易見，大宮做嘢多數揀作客，其次係輸咗都唔會畀人追近嘅對手。
德島升班機會微

咁今日有冇條件做嘢呢？首先大宮係主場，呢個機會減低咗，其次德島係想打升班附加賽嘅，弊在係佢哋落後第6位嘅長崎成功丸成7分，爭升班似乎口號多過實際行動，所以未必同大宮死砌。況且大宮連日皇盃已經3戰不勝，畀人批評全無鬥志，咁啱今日又有後衞橫山知伸坐波監，中場金澤慎有傷，個主勝賠率亦都比想像中好分啲，呢種環境係大宮「反彈」嘅時機，博主勝啦！