阿爾阿里希拉爾鬥大

猪拉多纳

首回合1：1 次回合哂冷

亞冠盃4強次回合，阿聯酋兵團阿爾阿里主場對沙特阿拉伯代表希拉爾，雙方首回合打和1比1，希拉爾失咗1粒作客入球，若然今場打和0比0就會出局，因此呢支沙特勁旅今仗必須入波先至有機會晉級，預料會搶攻。阿爾阿里擁有巴西射手洛迪高利馬助陣，入波能力佳，唔怕同對手搏拳，首選入球大。

（now 671周二晚11時45分直播）

希拉爾曾於1991及2000年奪得亞冠盃冠軍，上屆亦打入決賽，但最終不敵西悉尼流浪者，功虧一簣。希拉爾今屆捲土重來，爭標決心更大，踢法好進取，8強兩回合對歷基韋亞，分別大勝4比1，以及打和2比2。因此，希拉爾近7場亞冠盃有5場開大，有路可捉，加上佢哋今仗必須盡快入波，扭轉劣勢，更加冇得縮。
阿里有前賓菲加射手火力猛

阿爾阿里雖然未捧過亞冠盃，但今年大事增兵，包括簽下賓菲加射手洛迪高利馬、高士路中場艾華頓列比路、前利物浦中場艾薩迪等猛將，中前場人腳強大。洛迪高利馬上季葡超轟入19球，級數十足，首回合亦射入1球，如果希拉爾壓得太上，隨時畀佢反咬一口。

阿爾阿里今屆亞冠盃5次主場出擊仍不敗，當中兩場主場出現特大比數，包括打和吉達艾阿里3比3，以及贏泰拉克托3比2，8強主場亦以2比1擊敗德黑蘭。阿爾阿里今仗有地利，無懼同希拉爾火併，開入球大機會高。