尼馬弗爆巴塞殺「迪」唔留手

猪拉多纳

歐聯E組又有「地上最強」出場，巴塞隆拿作客白俄羅斯王者巴迪，後者就算擁主場之利都唔值得冷敲。雖然巴塞有球王美斯同恩斯尼斯養傷，但仲有尼馬同蘇亞雷斯撐住，當中巴西球王喺聯賽食出大四喜後，自爆好有信心完成續約，就連教練安歷基都罕有咁開聲撐佢，1.7倍「讓客」抵捧！

（有線62及202周三凌晨2:45直播）
安歷基力撐有信心續約

「地上最強」輸完畀西維爾後，日前喺主場以5:2大勝華歷簡奴成功反彈，當中尼馬連入4球當然被捧上天啦，而且佢親自澄清，本身好希望留喺巴塞，就算曼聯斟佢都唔會心動，好有信心完成續約咁話。唔只咁，教練安歷基狂鬧山度士要求國際足協罰尼馬停賽6個月嘅傳聞，仲話如果係咁，不如罰夠6年，相信尼馬聽到會好開心。
巴迪聯賽封王戰意鬆懈

大家知啦，尼馬同安歷基嘅關係向來麻麻，家陣美斯受傷，佢唔止可以做大佬，仲有安歷基幫佢開聲鬧人，相信佢會好享受呢種感覺，有望繼續爆發。對家方面，巴迪曾經喺主場以3:2打沉羅馬，日前仲奪得聯賽冠軍完成10連霸，但正因為咁，佢哋啲球員可能會掛住慶祝戰意鬆懈，對住巴塞好難有運行。