勝利砌侯姆城無大不歡

猪拉多纳

澳足盃今日下晝上演4強戰，由墨爾本勝利喺中立場對侯姆城。由於今次比賽嘅中立場其實係勝利另一個主場，所以勝利變相有主場之利。侯姆城晉級過程中從未遇上澳職兵，但呢班波入得又失得，遇上強敵都唔會死守，阿謙認為入波唔會少，大細中位數就算轉3.5球都照捧1.62倍大盤。

（有線64及203台周三下午4時30分直播）
勝利打澳足盃例去盡

勝利喺澳足盃火力唔曳，由32強去到8強，每場最少都攻入3球，今仗雖有前鋒艾奇湯臣同後衞尼高拉斯安素因傷唔踢得，但其餘前線主力好似貝利沙及巴巴路西斯等都可候命。值得一提係今場比賽嘅維多利亞墨爾本矩形球場其實係勝利另一主場，早前澳足盃8強贏阿德萊德聯就係喺呢度踢，勝利可以話有埋地利。

維多利亞省聯賽球隊侯姆城喺澳足盃一路過關斬將嚟到4強階段，但晉級過程從未遇上澳職球隊，可以話未受真正考驗。侯姆城自32強開始同對手都踢到難分難解，當中有兩場更要打到加時，而呢3場波同樣開大盤，證明球隊攻強守弱。侯姆城今仗有後衞艾度根停賽，對防線影響甚大，加上佢哋9月同勝利踢過熱身賽曾經攜手炮製7個入球，今仗就算入球大細中位數調整到3.5球，阿謙都撐大盤。