朝早有動靜：薛達志心急破悶局

纯情小彩迷

　　昨朝有八組試閘，多位大師傅均遲到場，早段場面較為冷清。德國籍練馬師薛達志，今季認真當黑，養馬量不斷流失之餘，季內成績亦大倒退，現時只得四場頭馬，成績暫居練馬師榜末。上周三的谷中賽事，原本以為頭場「森淼盛」可助馬房打破悶局，豈料勝後被貶，霉氣似乎仍然揮之不去。

　　今晚谷中夜賽，薛廐派出四駒上陣，當中以「勁爆力」、「龍馬精神」最值得留意。近日當兩駒出操時，薛達志全程跟出跟入，動態絕不尋常，似乎已心急贏馬，宜加盯緊。

　　另外，伍碧權馬房亦有搏殺消息傳出，列陣第三場四班1200米的「質超駒」，季內四戰谷草1200米未曾脫三甲，演出穩定，路有專長，今次改用楊明綸減磅上陣，對爭勝有幫助。而昨朝伍碧權在欄邊督操時，見楊明綸經過，便叫停騎者密斟幾句，如斯鏡頭以往並不多見，明顯對今戰睇重，兼顧為宜。

　　至於已近兩個月未有贏馬的霍利時馬房，在今戰擺出頗強陣容，旗下戰馬如「嘉飛」、「星火燎原」及「駿冠」等駒，均擅於谷中作戰，不難取得成績。近日練者找來多位大師傅幫手仄馬，並罕有地在沙圈睇馬兼且與騎者傾談馬匹操練情況，動態相當緊張，不可不防。

　　今晚吳定強馬房亦有多駒參戰，昨朝練者便與「喜在心頭」馬主一齊督操，睇實各駒操練過程，頗為肉緊，看來今晚也有郁手迹象，值得參詳。

韋柏