借題發揮： 「預視能力」冇理由差 千萬3T韋達把關

纯情小彩迷

　　上期亨利嘅預言估啱咗二分一，可惜最重要嗰二分一就衰咗，以為柏寶停賽在即，騎師王有機會再冧莊，點知同分之下數胡尾輸?，而估啱嗰二分一則係佢可能預視到之後嘅賽事，佢啲友好馬房冇乜大動作，只要睇吓今期賀賢出幾多隻馬，就知佢選擇正確（一隻咁大把）！好嘞，至於呢期韋達就騎足十場，佢肯延期，呢排梗有聲氣，既然夜賽白果，唔通呢次又孭鑊，冇理由人延期佢延期，預視能力會差得咁緊要啩！？

　　望落佢啲坐騎，都幾多叫胡馬，譬如頭兩場嘅「盈彩繽紛」和「越跑越有」已經好有餐士， 前駒嚟香港之前已做好晒基本功，試大閘又次次有走勢，博第一W仲有啲賠率，下次可能廿皮都冇。後駒剛仗初次增程1400 米，輸唔到一個身位返嚟，能力有辦你睇，仲要今場對住一大堆BB，形勢正到暈，所以呢口韋達孖寶點都要諗吓。

福龍唔會變鵪鶉

　　此外，佢3T嗰三匹坐騎「冰火」、「福龍」和「超群財星」，亦唔可以當冇到！冇錯，今季韋達根本未「泥」過，仍然在田泥冇W落袋，但「冰火」喺五班真係打橫行噃，跑得番前仗入圍水準，冇W都有P。而「福龍」贏開，話就話上次大勝喺五班，1 分48 秒幾，冇花冇假，班忽然孭少十磅有多，冇理由即刻變鵪鶉。
　
　　而「超群財星」，啱啱季內第一次跑，隔咗一年有多冇出賽，表面上嗰場泥地1200 米，冇前又冇後，實際輸唔到五個身位。跑完仲整多個大閘省省佢， 擺埋韋達上去，恕小弟想法單純，小注點都試一試。呢期3T中到成千萬，話唔定韋冠軍真係幫到手噃！　

亨利