皇馬作客「大」有把握

猪拉多纳

王牌C朗專恰西維爾

今晚西甲有好戲碼，西維爾會喺主場恭候皇家馬德里。眾所周知，西維爾主場出名硬淨，特別係對住皇馬呢類班霸，每次梗打高一班波，相信今仗都唔會例外。不過，皇馬今季演出穩定，近期走勢凌厲，王牌C朗仲至愛入西維爾波，相信今晚好大機會大手交易，1.5倍入球大熱一熱都要捧場。

（now632台周一凌晨3:30直播）

西維爾今季兼顧西甲、歐聯兩條戰線，明顯有啲吃不消，聯賽現時得12分排中游，表現受一定影響。不過唔好以為佢哋今晚輸梗喎，一個月前，佢哋喺主場贏巴塞2:1，嗰場波贏得不知幾清脆。論人腳，西維爾一啲都唔差，前鋒有頂得之人洛蘭特，中場就有班尼加同雷恩斯校炮，火力有一定保證。
兩軍皆攻得料多波入

皇馬周中歐聯以1:0小勝巴黎聖日耳門，小組首名出線高唱入雲，士氣冇得頂。仲有呀，皇馬開季至今累積14場不敗，表現相當穩定。賓帥表明今場作客3分係志在必得，主力C朗當然係重要棋子啦！呢位葡國「萬人迷」獲准掛免戰牌，唔使為葡萄牙出戰本月鬥俄羅斯同盧森堡嘅太公波，可以專注為皇馬搏殺。睇番往績，C朗過去10次面對西維爾，足足入咗19球，包括上季喺西維爾地頭大演帽子戲法，既然兩軍都咁攻得，入球大仲邊走得甩吖！