洪禮賢講馬：引伸波幅贏多鋪

纯情小彩迷

　　送歲賽事，搵年晚錢，預祝讀者們得心應手。至於今期形勢，韋達及蔡明紹出足八場，不過唔係我杯茶，雖則唔敢撇低晒佢哋嘅馬唔貼，但博Ｗ還有很多選擇，總覺是次賽事係爆冷格。

重心場次

第2場  第四班（60-40分）1200米

　　皆大歡喜上場跑多兩步會連Ｑ都攞埋，輸在沿路和出彎蝕多了，同埋入正直路唔能夠第一時間變到速﹔嘗試加脷帶去改善用意好，希望Ｂ欄九檔未至於處境太差，有權贏。

　　「駿盈」上仗大致上慳晒及跑盡晒，只係僅僅捱到個Ｐ，再遇前駒未必頂得順，只因四班有微利才拖。「巧奪天工」唔係十二檔，可能會做膽，減夠分落班，終轉程及用韋達（上季人馬兩次合作贏晒），表明心意。「宇宙良駒」二檔易咬好位，加上今場早段未必快，或會賺點形勢。「龍船旺」少負十磅卻排十檔，際遇難測。「御將軍」上場太差令人卻步。「千兩寶寶」最看不透，臨場情況定取捨。

第1場  第五班（40-10分）1200米

　　喜鵲五班幾超，問題係十一檔會如何處理，白德民若採用「易搏贏」的方式，有權一條直路掃晒，如無故跟前，一出閘可能要搣飛﹗「齊齊掂」終於有一次跑此程唔使排大外檔，預期取位唔使咁蝕，能力有若干升值。

　　「開心假日」及「鑽之寶」夠速度，排埋內檔，已算有條件。「綠翔王」只怕跑法過份被動，唔易追，邊線馬。

第3場  第四班（65-40分）1200米

　　金紫荊少馬帶，壓迫力冇咁大，此程亦啱放，一檔慳埋腳程，就算重磅也具贏面。「最上」困擾在於賽後不良於行，仲要準備進程曾疏落。

    「聖河」落班即做嘢，心態完全唔同晒﹗﹖但冇信心可言。「勁飛馳」又跑短，驚拉士難收復大量失地。「大旋風」外檔唔怕。「新薪」從往績顯示，外檔影響好大。「揀得準」路程上兜了一輪圈子，終返根據地，大冷可拖。「好友緣」場場輸到脫晒節，自購馬似乎未適應水土，初落四班都冇用。「盈驥」三場三班賽完全冇還擊能力，檔好都難言信心。

第4場  第四班（60-40分）1650米

　　引伸波幅唔留到咁後，剛仗贏來易過借火，除非贏完耗力過巨，若不，以贏馬締速作據（快過當晚兩場3班同程頭馬），仍有能力Ｗ。

　　「九龍寶」初跑此程有Ｐ收貨，呢次仍有檔位形勢，再追。「威威福星」剛賽前中段處理不太稱心，換番小將可能更好。「揀得正」休出初跑谷草後追有點勢，本身受騎，用阿郭或更啱。「果然勁」冇馬放，若步速掌握得好，未必冇Ｐ。

第5場  第三班（80-60分）1650米

　　發達心聲上場贏個幾身位加十分，比較當晚兩匹同樣贏馬的廐侶，加分幅度還要多，似乎受到評磅員重視，而按上場姿態，除非忽然回落，若不，三甲冇問題。「超勁精神」會受惠今場快鬥快的場合，加上與前駒讓磅角色調轉，或可反先。

　　「財到得勝」路程有晒根據、「好勇駿」有晒卡士，正路配腳。「包裝老友」慢步速愚敵的策略，今場幾難行得通。「重量級」近期唔放，啱唔啱見仁見智，不過如守到好位，或順應到形勢。「越戰越勇」連續兩場輸近的賽績未算證明得太多。「不老英雄」上仗第三水準唔高，咪太高估。

第6場  第三班（80-60分）1800米

　　財駿福星近兩仗表現普通有藉口原諒，重返此程而檔位好，大可再畀機會。「同心同德」季中跑起晒，搏開未贏唔會停。

　　「士多啤梨」前次能贏「悅璐孖寶」，水準放在此場秤先好多。「威力高」漸感失望，加上今場外檔或拖垮。「睡得好」內檔或驅使主動多少，可能更合發揮。「旺國手」上場一步都冇，嚇窒了，但分利馬應很快現形。「好知己」上場賺晒卻衝唔起，稍失望。「文武精英」及「旅遊小子」長力未證明。

第7場  第三班（80-60分）1200米

　　特好回到三班惡得多，加配件如幫到早段冇咁慢，贏得。「聲威旺」長期近近近，但博Ｗ不宜。

　　「新蝦王」留得後的確冇守好位跑法咁好，但如適應到，呢次或追得更強。「精彩生輝」贏級數，輸排檔，有賠率可博。

　　「龍武軍」贏完一滴都冇﹗「團隊精神」與「眾威旺」新勝後冇晒飛，有指引性嗎﹗﹖

第8場  第一班（105-80分） 1000米

　　金德寶在此廐初出已跑得好的ＰＰ，10年未必有１隻，實力肯定唔嘢少，轉場若勝任，再贏。「威利多多」此程和1200米同樣ok。「鑽飾光芒」

　　「紅旗威揚」如非大外檔起步，必揀。「鼓浪天風」跑短二百米，驚衝唔起﹔「開心風采」亦然。「桃李滿門」唔厭戰的話，負輕磅在此場有得博懵，要拖。