|
恭喜發財！祝讀者們心想事成，今日賀歲賽最緊要攞頭彩，虎年由年頭發到年尾！而亨利今日嘅重點目標係蔡約翰，無他嘅，睇佢今日派嗰手馬真係好有氣勢，兩場、三場，定係四場W，咁就唔知嘞，但好開嗰一批，點都唔會令捧場客失望啩！？所以呢期買咩彩池都好，就算唔做膽，一注半注點都要拖住呢個馬房嘅馬，唔理賠率冷又好熱又好啦。
國寶上三班夠爭
睇番對上兩季蔡廐都有賀年頭馬，如果要搵呢期最貼題而又啱嘅，肯定係「歡樂繽紛」，新年流流，邊有人想吵吵鬧鬧，梗係歡歡樂樂，和氣至生財嘛！講到呢隻全熱門，上場冇跑成七個月，一樣贏到收韁返嚟，睇時間，唓！仲慢過當日五班嗰組，唔叻噃，但一來過程夠晒滋油，而佢其實在轉直路彎一段，曾經被撞到失晒平衡，修正完仲有本事輕鬆贏返嚟，真係超到阿媽都唔認得，今次對住啲三班水皮對手，因全場得一隻季內贏過三班，邊有阻力。
至於「勇敢小子」及「國寶」，前駒直落四場未輸過，叻成點冇人估到，只係呢次初跑1600米要博目前氣量到唔到，但見佢上場拉士衝落仍然好韌，終點前仲漸漸甩番開對手，跑長二百米，no problem ！後駒上三班負輕磅，本身唔係唔夠班，怕咩對手級數提升，加上韋達114磅都走去造，新年肯節食，有晒誠意，隻馬亦準開，信得過喎。就捧呢三駒，希望乘埋，山大斬埋有柴！
亨利 | 
金睛卡
发表于 2010-2-16 11:14
变色卡
显身卡