獅吼主場硬淨恰慣墨城

猪拉多纳

今日澳職獨腳戲，布里斯班獅吼主場迎戰墨爾本城，獅吼今季成績出色，皆因主場搶分成功率達百分百，主場3戰全勝，水準可靠。至於墨爾本城踢法有前冇後，表現非常飄忽，遇上穩紮穩打嘅獅吼，肯定輸蝕。布里斯班獅吼主W有1.85倍，值得一試。

（有線64及203台周五下午5時直播）

布里斯班獅吼今季表現大為改善，開季後一直位居積分榜前2位置，好大程度上因為增兵見效，新加盟嘅前鋒占美麥卡倫，迅速融入球隊，已有3球進帳。加上20歲小將班頓波里路演出令人驚喜，佢今季4個入球，全部都係主場射入，成為球隊主場全勝嘅大功臣。今仗面對防線脆弱嘅墨爾本城，相信兩人將有大把表演機會。
墨爾本城防線勁曳

墨爾本城踢6場聯賽入12球，失13球，的確好有娛樂性，但成績就麻麻，僅2勝1和3負，上仗主場更慘吞西悉尼流浪者3蛋，球員難免洩氣。墨爾本城過去4次作客獅吼，亦輸咗3次，種種因素都顯示墨爾本城今仗冇運行。