馮諾嘉手記：新年講意頭要時時攞彩

纯情小彩迷

　　剛剛大年初三有唔少親戚朋友入馬場湊熱鬧，散場後仲一大班人走咗上嚟小妹屋企拜年，因地方淺窄，搞到座位都唔夠，要大家企喺度食晚飯。

　　睇番沙田十一場賀歲賽，賽果相當正路，並無爆出過千蚊嘅Q，熱門馬亦多數有表現，當然有唔少親友贏錢而回，發發新年財，講開當日睇好嘅心水馬，有時真係及唔上呢班親友，好似第二場四班1200米嗰場，「豐衣足食」抽十四檔咁蝕底，機會點都會打多少折扣，小妹冇攞嚟做膽，偏偏成班親戚靠佢贏大錢，又中Q，又用嚟過關，佢哋話，新年入場梗係要先買意頭好嘅馬，理由就係咁簡單。

　　而係咁多位騎師當中，小妹親友們只係識得韋達，所以場場搵佢嘅馬拖多幾隻博Q同QP，韋達雖然只係憑「勇敢小子」贏馬，但係有成六隻馬跑第二，呢次佢做咗二奶王，但造就呢班平日唔賭馬嘅親友贏好多錢，佢哋喺度猛「晒」開心，搞到小妹都冇聲出。

　　親友們教落，新年入場要支持下啲意頭好嘅馬，周日四班泥地1200米，咁啱小妹睇好匹「時時攞彩」，呢匹馬至今跑過兩場，1000增程到1200米，雖然兩戰都未有表現，但睇賠率都已經有唔少捧場客支持，而走勢上亦有進步，復課晨操表現亦對辦，今次初跑泥地，但之前試過泥地大閘，後上追勢相當好，以第一名過終點，所以相信泥地一定啱佢跑，有力贏馬攞彩。

超群如意實力超級

　　另一匹好意頭嘅馬係三班草地1400米嘅「超群如意」，來港至今跑過四場，初出當熱身已跑獲一席第四，之後三戰同程獲一冠兩亞，而兩場亞軍仲要只係輸短馬頭位，最近兩場後上大熱搏失，真係有啲失運，但論馬實力絕對超出第三班，今場有機會補中，贏馬升班去也，要追捧好意頭馬，又點少得呢兩匹呢﹗