季後賽3國誌 勁旅鬥衝刺

猪拉多纳

日職、阿甲同墨超常規賽已經結束，呢3個聯賽將會喺明早開始踢季後賽。日職嘅浦和紅鑽同大阪飛腳將會爭奪嚟緊總決賽嘅入場券；阿甲嘅6支球隊就要搶踢南球盃嘅資格；至於打入墨超季後賽嘅8支球隊，就會全力爭逐全季總冠軍。各支球隊各有鮮明目標，勢必打崩頭爭取勝利。
紅鑽攻力爆燈大盤必捧

日職今午嘅季後賽由紅鑽主場迎戰飛腳，爭奪餘下一個總決賽嘅席位。紅鑽以首階段冠軍身份殺入季後賽，球隊近期入球數字驚人，但防線唔算太穩陣，面對以兩階段總排名第3位身份躋身季後賽嘅飛腳，為求喺呢場一場過嘅季後賽勝出，勢必全力搶攻爭勝，阿謙捧大盤。

（有線61及201台周六下午1時直播）
飛腳作客有力入波

紅鑽係日職首階段冠軍，實力唔使懷疑，球隊最近4場波攞到3勝1和，贏嘅對手包括FC東京、町田澤維亞同神戶勝利船，和波就係對川崎前鋒，呢4場波總共轟入17球，可見呢班波火力強勁。紅鑽射手興梠慎三同中場柏木陽介近期頻頻有波入，加上斯洛文尼亞射手隆比真歷今仗有望復出，球隊前線人才濟濟下，要入波可謂無乜難度。

對手飛腳自亞冠盃出局後表現反覆，近5場錄得3勝2負，贏嘅對手只係仙台維加泰、川崎前鋒同山形山神之流。佢哋上月雖然曾喺主場贏過紅鑽，但今仗作客極為惡踢，球隊近兩仗贏波夾埋入咗對手6球，呢場面對防線唔太穩陣嘅紅鑽有望搵到入球，阿謙估計今場入波必多，捧大盤。
兩虎相鬥堤格雷斯玩大佢

聽朝上演兩場墨超季後賽8強次回合，頭場係「兩虎相爭」，基亞帕斯美洲虎返主場迎戰「老虎」堤格雷斯(Tigres)，堤格雷斯首回合雖然贏波，但卻失咗1個重要嘅作客入球，今仗作客亦不能坐以待斃，好彩其法國箭頭基格納弗到爆燈，面對火力強勁嘅美洲虎隨時合演入球騷，大盤咪錯過。

（周日早上8時開賽）

首回合堤格雷斯一度被追和下終贏2比1先拔頭籌，但咪以為咁就坐定粒六，因為美洲虎轟入一個重要嘅作客入球，只要今仗返主場小勝1比0，便可憑作客入球晉級，因此堤格雷斯不能踢得太保守。查實「老虎」陣中坐擁弗爆箭頭基格納，呢位前馬賽球星唔單止喺春季聯賽有11球進帳，首回合更為球隊打開紀錄，絕對有本錢以攻代守。

至於美洲虎係春季聯賽兩支主場不敗球隊之一，而且喺自己地頭攻入19球拍住春季一哥普馬斯，既然落後緊一粒，為殺入4強必傾力反撲，斯維認為呢場駁火格局入球一定多，1.82倍入球大抵玩。
利昂主Ｗ攞尾彩

另一場8強次回合利昂主場對ＣＦ阿美利加，由於ＣＦ阿美利加首回合大勝4比1，利昂質素所限，有地利都好難翻盤，頂盡小勝攞番個尾彩，簡簡單單捧主Ｗ。

（周日早上10時06分開賽）
拉魯斯格食格再恰甘拿斯亞

阿甲聽朝會上演3場爭奪南球盃入場券嘅附加賽首回合，其中拉魯斯喺主場迎戰甘拿斯亞。拉魯斯近期戰績唔錯，加上球隊近年面對甘拿斯亞贏多輸少，擺明「格食格」，拉魯斯主Ｗ有買趁早。

（周日早上7時15分開賽）
近6交手未輸過

拉魯斯自踏入11月後表現逐步回穩，球隊喺聯賽最後兩輪錄得1勝1和，取得爭奪來屆南球盃入場券嘅附加賽資格。之後佢哋更進一步，主場2比1擊敗紐維爾舊生，躋身附加賽決賽。查實拉魯斯近兩仗贏波都係喺主場，咁啱都贏2比1，可見呢班波喺自己地頭出戰特別醒神，球隊雖有中場干沙路卡斯迪蘭尼同列托有傷，但以佢哋近6次遇上甘拿斯亞奪3勝3和不敗嘅佳績，應可先下一城。

至於對手甘拿斯亞近況其實唔差，近4場波錄得3勝1負嘅成績，而首圈附加賽大勝聖馬田聖祖安5比1，但要留意嗰場係主場賽事，呢班波近8仗客戰只係贏過1場，而且仲輸咗5場咁多，就算球隊能夠夫添上陣，面對主場惡氣十足嘅拉魯斯，相信都係惡唔出樣，阿謙推介拉魯斯主勝。