熱刺車仔大騷Encore

猪拉多纳

倫敦打吡王哈利仔着火

今晚英超早場由熱刺主場對車路士上演倫敦打吡，「熱刺戰神」哈利卡尼着晒火，連續6場有波入，遇上近況略見起色，但有隊長泰利因傷上陣成疑嘅車路士，「哈神」相信又有得數胡，加上兩軍過去3次聯賽對碰都開大，大家今晚等睇入球騷，1.85倍大盤要捧場！

（now 621周日晚8時直播）

哈利卡尼季初遇上入球荒，但自從喺10月尾對般尼茅夫連中三元後，信心腳風返晒嚟，計埋兩場歐霸賽事，已經連續6場有「士哥」，其中上場英超對住另一倫敦球會韋斯咸，「哈神」就包辦兩球幫球隊大勝4比1。睇番數據，原來「哈神」係倫敦打吡史上場均入球數字最高嘅球員（0.86球），比阿仙奴「高貝利大帝」亨利場均入0.73球更勁。

「哈神」喺同市宿敵對壘嘅14戰中，攻入12個入球，當中包括上季主場大破車仔5比3，「哈神」亦轟入兩球，今場面對防守欠穩嘅車仔，呢位「倫敦打吡王」當然要把握機會，入更多波刷新紀錄！
泰利有傷 車仔防線堪憂

哈利卡尼近期瘋狂數胡，主要多得一班好拍檔相助，其中基斯甸艾歷臣近4仗就交出3個助攻，呢位中場發電機今季一共創造咗31次機會，平均27分鐘就有1次，效率僅次阿仙奴嘅奧斯爾同韋斯咸皮耶，咪忘記艾歷臣更係一位罰球專家，呢班進攻好手在陣令熱刺近排火力咁猛。

車路士近兩場全勝兼冇失波，似乎有啲撻番着嘅迹象，但睇番佢哋聯賽6場作客錄得1勝1和4負，其中有5場均失2球或以上，今場隊長泰利因傷上陣成疑，加埋門神泰拔高圖爾斯續抖，防線唔多穩陣，入球大咪走寶。