墨城趁火打劫

猪拉多纳

水手7戰不勝士氣曳

今午澳職獨腳戲，尾三嘅中岸水手主場硬撼墨爾本城。水手自開咧戰贏波後，已經7場不勝曳到冇朋友，撞正有射手榜一哥科拿路利壓陣、火力冠絕聯賽嘅墨爾本城，今仗凶多吉少，墨城小讓平半值得捧場。

（有線64及203台周四下午5時直播）

季前被視為爭標分子嘅中岸水手，自首輪險勝珀斯光輝3比2後，連續7場聯賽未贏過，當中仲輸咗5仗，場均失兩球，係聯賽失波最多球隊，淪為尾三絕非冇因。值得一提呢7場，水手都係先失波嗰隊，只有兩仗逼和到對手，睇得出佢哋每逢落後就會慌失失，完全唔識踢逆境波，今仗亦有中場格連迪菲路受背傷上陣成疑，加上連場不勝令士氣低落，就算有地利亦難望反彈。
攻擊點多 水手有難

另一邊廂，墨爾本城有強大「軍火庫」，最標青當屬科拿路利，呢位烏拉圭前鋒現時以6個士哥，拍住墨爾本勝利嘅貝利沙位列射手榜一哥，而且有佢喺前線做掩護，亦為身後嘅阿倫穆爾、柏亞達路、哈利洛維奴等製造更多入楔機會，好似上仗大炒珀斯光輝五個一皮，墨城嘅入波來自5名球員，可見其火力點眾多，令對手防不勝防，難怪佢哋依家轟入18球，成為聯賽入波最多嘅球隊喇，以水手咁弱不禁風嘅防線，點頂得住墨城嘅狂轟猛炸呀？墨城小讓平半，上盤乃不二之選，而且水手經常先失波，不妨捧埋墨城「第一隊入球」。