馮諾嘉手記：精彩生輝哩應補中

纯情小彩迷

　　有啲馬只係鍾意跑谷草，亦有啲馬淨係識跑泥地，結果局限咗發展，好似已退役嘅「幸運駿駒」，泥地所向無敵，馬會都曾破例編咗場一班泥地1200米，畀佢加夠分跑海外賽。

　　今晚第七場一班1200米，亦有匹好特別嘅馬，就係「八運寶」，近六次谷戰贏晒咁犀利，但係跑田草就完全走樣，不過，睇番佢最近晨課表現依然好醒神，今晚呢程大有可能係佢今季最後嘅爭勝機會，谷都「行」都係為呢仗，返番主場係時候威番鋪，一於搵佢做膽。

　　配腳方面，「點心」今季跑田草冇乜表現，今場返谷中對手較弱，有「八運寶」放頭，佢排一檔大可貼欄跟係二、三位，相當好跑，拖腳首選。「開心風采」前次同程贏得輕易，今次抽得有利二檔，可貼欄等入直路發力，可入三甲。「紅衣司令」喺田草跑開級際賽，級數最高，但係今次初跑谷草，蔡廐馬谷戰唔見得特別醒，作配無妨。

後上馬外檔冇問題

　　第七場三班1650米，「精彩生輝」贏1000米起家，逐步增程到1600米上名，睇練者嘅部署，一心為呢匹馬搵更合適嘅路程，上場谷草1200米後上不及跑第二，無疑已經嫌短，但只係以短馬頭位僅敗，今場增程一哩更啱跑，後上馬排十檔問題唔大，係時候補中，作膽。配腳先揀「開心歡樂」，最近連贏三仗，包括同程，計馬今場仍然可以名列三甲。「暢蝦王」季初喺呢程輕鬆贏馬，喺蔡明紹胯下三戰不勝有位，故劍重逢當然要拖。「不老英雄」，久沉馬難得回勇實搏盡，可作配。

　　第八場三班1200米，馬膽「美猴王」，呢匹馬連續贏三場之後，上場終於初嘗敗績，縮程跑谷草1000米，大熱門只以四分三馬位之差跑第三，明顯都係1200米最啱跑，韋達停賽，柏寶實行冷手執個熱煎堆，可望補中。至於配腳，「紅封包」近三場跑同程獲冠亞季各一，上場終點前同亞軍「歡樂出擊」鬥得激烈，但拋甩季軍「星火燎原」成兩個半馬位，今次再與後駒同場，跑入前列應冇問題，配腳首選。上場同程跑第三嘅「特好」，仲有今季三勝同程嘅「龍武軍」，呢兩匹實力馬亦要兼顧。