愛奴主場剋住「病壞」利雲特

猪拉多纳

今晚賽事唔多，但阿King依然搵到好嘢，就係西甲獨腳戲，由愛斯賓奴主場對包尾大幡「小蝙蝠」利雲特，兩軍上周中先喺西盃碰頭，結果各一言和，不過利雲特傷停唔少，加上近年造訪愛奴經常冇啖好食，今仗都係凶多吉少，愛奴小讓平半兼低水擺明有信心，上盤值博。

（now 632周二凌晨3時30分直播）

以往利雲特能限米煮限飯下穩站中游，但今季無以為繼，其中賣走射手卡勞烏捷最為致命，搞到攻力大削，開咧後僅得兩勝排緊包尾。「小蝙蝠」今仗除有安祖杜積奴、艾雲盧比斯及卡拉比拿斯因傷缺陣外，仲有經驗豐富嘅後衞桑法蘭坐波監，陣容天殘地缺。

愛奴只得利雲特舊將柏巴高尼迪奧普未好番，咁啱得咁蹺，佢哋上周中先喺西甲第4圈首回合造訪利雲特，一度靠馬馬度史拉入波領先，臨尾被追番1比1認真唔抵，今次返回自己地頭誓要贏番鋪，而且之前六次聯賽主場對利雲特僅一敗之餘，仲四度贏波，堅剋住「小蝙蝠」，加上讓球盤愛奴小讓平半，被壓到得番1.67倍咁低水，睇嚟莊家對佢哋贏波甚有信心，愛奴上盤有買趁早。
杜塞爾多夫火力削吼細盤

另外德乙杜塞爾多夫主場對布倫瑞克，杜軍今仗有進攻主力迪米亞巴爾停賽，火力大減，但布倫瑞克作客亦唔叻，之前三場聯賽作客未贏過，累鬥累格局捧細盤。最後英格蘭足總盃第2圈，非聯賽球隊甘士比主場硬撼英甲嘅梳士貝利，雖然甘士比連贏五場弗到震，但仍未夠料越級挑戰，況且梳士貝利近期攻力回升，仲有得受讓咁筍，讓球客勝絕對係過關變倍器。