悉尼齊心贏「德」

猪拉多纳

敗家仔荷洛斯高「贖罪」

單刀、近門空晒、禁區冇人嘜，一樣冇球入，點搞呀？講緊FC悉尼前鋒荷洛斯高呀！呢位斯洛伐克射手上場聯賽錯失咗4個黃金「餐士」，賽後喺更衣室同教練、隊友耍晒冧，今日造訪阿德萊德聯，係時候將功補過啦喎！一於撐FC悉尼全取3分，捧2.58倍客勝。

（有線64、203周五下午4:40直播）

曾經效力比錫達斯嘅荷洛斯高，上仗鬥紐卡素噴射機頻頻失機，好在FC悉尼最後都贏1:0，否則佢實孭晒鑊。呢件敗家射手都知衰，賽後鬼死咁自責，不過一班手足冇嬲佢，守將祖文同教練艾萊特仲大讚荷洛斯高做足晒本分，睇好佢嚟緊大把波入。成班戰友都咁撐你，荷洛斯高今日點計都要做番齣好戲，報答番佢哋啦！
隊長保斯基傷愈復出

更何況悉尼經歷一輪小低潮後，最近終止咗連續4輪聯賽失分嘅頹勢，最重要係由祖文同懷奧合組嘅雙中堅組合夠晒硬淨，協助呢班波喺開季9戰保持6場清白身，而且隊長保斯基腿筋傷勢冇乜大礙，今仗可以候命。
阿聯贏弱隊開齋實力有限

主隊阿德萊德聯上場聯賽終於開齋，不過咪忘記對手只係榜尾嘅珀斯光輝，贏1:0咁辛苦證明「阿聯」嘅戰鬥力只係「有限公司」，對住回勇兼人腳齊整嘅FC悉尼，有地利都難逃一劫。