拜仁「讓主」冧粉絲

猪拉多纳

歇冬主場謝幕砌達斯泰特

德國盃第三圈（16強）賽事分兩日上演，今晚先演4場，壓軸戲係班霸拜仁慕尼黑主場迎戰達斯泰特，拜仁啱啱喺德甲提早慶祝贏得冬季冠軍，歐聯首名入16強後亦休緊戰，歇冬前只餘下今仗同周末德甲作客漢諾威兩場難度唔高賽事，今仗係今年最後一場主場賽事，預期唔會有保留，有力大炒近況嚴重跌Watt嘅達斯泰特，拜仁讓2球，推介1.65倍讓球主勝。

（無綫翡翠台及TVB 13周三凌晨3時30分直播）

拜仁雖有唔少傷兵，但球隊兵源足質素超群，面對實力一般對手依然屈機，前線羅拔利雲度夫斯基，湯馬士梅拿同京士利高文殺傷力十足，尤其羅拔利雲度夫斯基啱啱呢個禮拜喺歐聯同德甲共轟入3球，追平名宿奇連士文為拜仁射入48球嘅紀錄，弗到爆燈。拜仁上季失落德國盃，今晚過年前最後主場當然希望送一場大勝畀球迷，等佢哋可以有更靚心情歡度聖誕。
聯賽作客炒過對手三蛋

拜仁喺不足三個月前嘅首循環聯賽作客贏過達斯泰特3粒，相比起當時，達斯泰特目前狀態更差。泰軍季初一鳴驚人，係倚靠爛打同死球戰術，但獨步單方已經畀列強睇通，佢哋近6場只得一勝，加埋只入3球，啱啱喺聯賽主場仲畀哈化柏林大炒4蛋，咁嘅狀態作客安聯球場真係凶多吉少。