馮諾嘉手記：勇敢小子冇有怕

纯情小彩迷

　　今日沙田十場賽事，重頭戲當然係第七場嘅香港金盃，呢場本地一級賽跑2000米，咁多匹名駒列陣，小妹就揀咗「自由好」做膽，呢匹馬今季兩度入位，就係未能贏馬交代，今次搵上季贏馬拍檔蘇銘倫執韁，故劍重逢不妨追捧。

　　配腳方面，大摩派成三駒列陣，佢個倉高分馬特別多，以往捧盃都捧到手軟，相對嚟講今季算係比較失色。睇番今季表現，三駒以「閒話一句」最好，季內同程獲冠亞各一，香港盃預賽一役輕易壓倒今日同場嘅「好先生」，相信今場三甲必入，首匹拖佢。「爆冷」上兩季搏得比較多，今季已經八歲，表現當然略為失色，但點都係馬王卡士，要兼顧。而另一匹馬王「好爸爸」，練馬師告達理上仗賽後同騎師杜利萊反晒面，成為馬場一時熱話，一個話要跟前多少跑，但往日贏馬功臣杜利萊就堅持後上最好，誰是誰非都好，睇埋今日都爾嘅表現自有分曉，當然要作配。

旅遊大亨開齋在望

　　分析完今日戲肉，再睇第五場四班1400米，「旅遊大亨」上場插四班首戰，可惜出閘笨拙，失地甚多，走起嚟亦論論盡盡咁，差不多留喺包尾位置，入到直路先至發力，末段以快時間跑第三，可見質高，今場只要走勢規矩啲，隨時可以贏馬開齋。配腳先揀季內兩戰同程都獲亞軍嘅「軍士」，再揀「勁飛馳」，前仗跑谷草一哩，上場縮程跑1200米，試準晒回師田草1400米，唔可以忽視。「傑出君子」上場同程跑第二輸唔夠一個馬位，今場仍要兼顧。

　　第八場一班1800米，呢場告東尼馬房出成四匹馬咁多，實行馬海戰術，可惜蔡約翰剩係「勇敢小子」已經夠晒惡，對住咁多東廐馬亦冇有怕，呢匹馬五出五捷，由四班殺到上嚟一班仲未斷纜，由1000增程至今場1800米，當為打吡大賽前操多課亦夠殺，狀態如日方中，馬膽之材。

　　東廐馬之中，「駿綵」同「漂亮第一」今季表現都唔曳，「駿綵」前仗跑田草2000米後上奪冠，雖然上場表現反覆，但有賠率，不妨作配；「漂亮第一」上場失準相信受黏地影響，場地正常要番佢。拖多匹近仗都跑近嘅「勇者無敵」。