流浪者「讓主」啱素

猪拉多纳

澳職平安夜上演榜首勁旅西悉尼流浪者主場對紐卡素噴射機，流浪者今季弗到震，近8場聯賽贏咗7場，重拾兩年前捧常規賽冠軍嘅霸氣。紐卡素噴射機剛好相反，已經連續7場澳職不勝，近3場仲冇波入，睇怕今仗都係等被劏。相信西悉尼流浪者可以大勝，同主場球迷歡度聖誕節，直取讓球主勝。

（有線64、203台周四下午4時直播）

西悉尼流浪者除咗係12/13年球季澳職常規賽冠軍之外，翌年更捧亞冠盃，根基雄厚。不過上季意外大失準，搞到排尾2。會方今季大展拳腳，簽入尼高斯、比奧華卡利等多位優質球員，效果立竿見影，中場尼高斯已有6球進帳，包括上仗尾段建功，作客逼和珀斯光輝2比2。以流浪者近4次主場全勝嘅走勢，今仗應可以重敲勝鼓。
噴射機火力弱難反擊

紐卡素噴射機開季首4戰3勝之後，表現無以為繼，近7場聯賽只有4和3負，包括11月首循環主場以1比2不敵西悉尼流浪者。噴射機最大弱點係攻力差，11場聯賽只入9球，成為唯一入波仲係單位數嘅球隊，估計今仗無力反擊，捧蛋居多。