日本冇優「細」

猪拉多纳

遇剋星伊拉克

U23亞洲盃今晚爆發兩場「撲飛」4強大戰，日本U23對伊拉克U23，同埋卡塔爾U23對南韓U23。兩場嘅勝方，都可以率先攞到里約熱內盧奧運入場券，點會唔打甩髀？但係日本U23碰着剋星伊拉克U23，好難炒得起，1.54倍入球細先至係最佳選擇。
多哈夢魘困擾藍武士

由於今屆U23亞洲盃嘅三甲，都可以攞到奧運入場券，所以打入決賽嗰兩隊，根本就等於攞咗個大獎先，呢4隊今晚同爭冠軍無異。如果從近況去睇，日本U23、伊拉克U23都係8戰不敗，足智彩個對賽紀錄係各勝一場，實質上「藍武士」主帥手倉森誠由2013年起帶日本U20、U22對住伊拉克都兩戰兩敗，今次大家升上U23年齡層再交手，日本根本冇絕對把握話必勝，尤其1993年日本大國腳响世盃外圍賽輸畀伊拉克冇得出線嘅「多哈慘劇」，更係日本U23嘅夢魘。

呢次日本U23响多哈遇着伊拉克U23，引發東瀛傳媒激烈討論「多哈慘劇」，大家可以認為呢單23年前嘅悲劇，會激起日本小將嘅復仇心理，但係响U20、U22兩次嘅對陣，伊拉克都食住日本嘅事實，或多或少都會對日本U23形成陰影，今場未必會好似分組賽踢得咁放。
伊拉克驅逐主將離隊

依家日本U23嘅最大優勢，在於人材濟濟，而且前邊有鈴本武藏、安拿胡阿道兩件日非混血兒，多咗瓣高空進襲嘅衝擊戰術，比起其他年齡層嘅日本更有條件打強攻。不過，日本戰術多變嘅優勢，同樣引起咗伊拉克U23嘅注意，領隊阿杜加尼承認佢哋呢幾日不斷研究日本嘅「真實」風格，擺明好顧忌對手有長有短嘅踢法，今晚一定會穩紮穩打，好易同日本U23形成相持局面，呢啲波想開大都難。何況伊拉克個中場6號仔薩爾夫前日突然懵咗，訛稱個女病到就死要求離隊一陣，點知畀人發現講大話，即時被踢出隊兼無限期禁入國家隊，伊拉克少咗呢件中場大腦，點會唔守字行先吖？