馮諾嘉手記：華忠寶路合三甲穩

纯情小彩迷

　　聽日沙田十場賽事，重頭戲當然係第八場嘅打吡大賽，而唔少大倉口更配合咗成手馬出擊，幾乎每場都有一、兩匹明星馬響度，精采可期。

　　第二場五班1200米，小妹揀咗用「華忠寶」做膽，上場跑谷草1200米亦只係以個半馬位輸畀「秒秒領先」，走勢其實唔曳，今場回師贏馬路程田草1200米，韋達肯繼續效力，三甲幾穩。

　　對手方面，「時時有機」上場跑谷草1000米冇表現，但睇番季內曾響田草1200米同「驍騎無敵」串Q，賽績夠硬淨，唔能夠睇小。「穩操勝算」上場跑一哩嫌長，今次縮程應該會有唔同表現。「高駿」排一檔起步好跑，可以兼顧。「鴻霸之星」九歲馬仲有兩腳，唔排除可以跑近。

　　第六場三班1600米，小妹鍾意「天瞳」，今季轉入安廐之後的確大有進步，前仗響1400米以半個馬位輸畀「好心星」跑第三，已經交出唔錯走勢；上場轉攻田草1600即刻順利補中，五歲馬仍然有進步空間，最強對手「國寶」退出埋，睇嚟可以再贏一場。

　　配腳方面，「好芝味」上場末段造出全場最快嘅22.55秒得第四，表現並唔簡單，今次再跑田草1600米換賴維銘操刀必定有賠率，值得一博。「大家開心」跑法夠主動，今次排二檔估計可以一早貼欄搶出守好位，如能夠順利操控步速，三甲可期。「旺國手」演出雖然失準，但今次除晒所有配備兼用最佳拍檔戴勝操刀，或者可以變身。「大將風範」評分有利，隨時可以郁手。