馬體會西甲快車做細界

猪拉多纳

今個周中歐洲主要聯賽齊開快車，夠晒熱鬧，阿King想講下剛喺「馬德里打吡」贏波嘅馬德里體育會，今晚深夜西甲主場迎戰另一支「皇家」球隊皇家蘇斯達。馬體會特色係守強攻弱，今季踢咗26場西甲有19場開細盤，比率高達73%，包括近3場聯賽都開細，今場入球細做過關膽夠穩陣！

（now 632周三凌晨4時直播）

馬體會王牌射手基沙文上場鬥皇馬一箭定江山，打破個人近期入球荒，「床單軍團」最近兩次聯賽鬥皇蘇均贏2比0，曾效力皇蘇嘅基沙文兩場都有波入，倒戈隨時又做皇蘇剋星。不過喺施蒙尼領軍下，馬體會唔算主攻型球隊，往往喺取得領先後就死守到完場，導致經常開細盤。皇蘇近5場聯賽錄得4勝1和佳績，只係失咗2球咁大把，今場作客料會加強防守，細盤咪錯過！
串埋車仔上盤漢諾威大

英超方面，阿King睇中車路士作客諾域治呢一場，車仔易帥後成績回穩，今場面對近8場輸足7場嘅諾域治，贏波冇難度。諾域治7場輸波入面，有5場係輸2球或以上，車仔今場讓半一照捧上盤。

（now 622周三凌晨3時45分直播）

最後講埋德甲直播賽事，榜尾嘅漢諾威主場鬥禾夫斯堡。漢諾威剛喺上個周末結束5連敗頹勢，作客2比1反勝史特加，士氣大振，今場繼續搶攻。睇埋往績雙方近4次交手有3次開大盤，不妨再追！

（now 670、有線61及201台周三凌晨3時直播）