馬主論戰：健康藍莓食得

纯情小彩迷

　　蘇狄雄近期響快活谷真係旺得交關，睇嚟今晚都要繼續追捧佢啲坐騎，最鍾意第二場「健康藍莓」，初跑谷草已經可以響一哩贏馬，證明窄場性能出色，早排跑泥地同「威猛情人」鬥到叮噹馬頭返嚟，三歲馬一定仲有分在手，今次增程跑2200米，如果早段放得順，對手要追都唔易。

　　另一匹要留意嘅蘇狄雄坐騎係「馬霸龍」，上場流鼻血後復出都跑得唔錯，證明健康冇大礙，今次跑1800米排得一檔起步好着數，話唔定可出頭。

（梁廷鏘）

健康藍莓吼實飛躍星河

　　大摩剛啱憑「神州八號」同「鳥語花香」起孖，搏殺手風轉順，我睇好佢今晚繼續有馬贏。最啱心水係頭場「飛躍星河」，前仗響谷草2200米跑第三，輸畀頭馬唔夠一個馬位，證明響五班惡氣十足，上場跑田草輸咗唔能夠作準，今次回師谷戰可見真章。

　　另一匹要留意嘅摩廐馬係「勁勇士」，雖然五戰仲未出頭，但已先後兩次入Q，質素應該唔曳，今次轉嚟谷草上陣，無非貪對手較弱，加頭罩又重戴交叉鼻箍，一定搏命。

（任達華）

開心動力夠準

　　剛戰方嘉柏憑「極品絲綢」贏打吡夠晒威水，今次返嚟谷草上陣，雖然方廐出馬唔多，但估計繼續有馬贏。推介第六場「開心動力」，以往三戰谷草1200米獲兩冠一亞，演出夠晒準，贏馬後隔一星期再跑，只要體力頂得住可以再贏。

　　另一匹要留意嘅方廐馬係第七場「寶貝王子」，雖然唯一頭馬響沙田取得，但以往跑三次谷草一哩亦得兩亞一殿，證明都好啱發揮，今次再跑谷草一哩，搵埋贏馬拍檔柏寶操刀，點計都唔似係陪跑。

（張敬山）