洪禮賢 講馬：易搏贏咪放手

纯情小彩迷

　　幾位前列騎師之中，韋達及柏寶今晚聲勢唔算特別，反而德叔就唔同，跑六隻唔算好多，但大部分好似唔飛得，睇嚟佢呢期唔係冇機會做番次騎師王﹗﹖此外，巫斯義今晚出馬唔多，但唔係冇實力，或有驚喜。

重心場次

第6場  第三班（80-60分） 1200米

　　開心動力愈跑愈叻，上場放出仍可輕勝，目前負中磅依然有優勢，加上三檔可留可放，形勢自己話晒事，有連捷本錢。

  　  「超勝」一下子孭少廿三磅，殺上三班也不怕，而上場初跑此程幾乎贏，看來同程不比1000米失色。「大旋風」初上三班吃悶棍，只因路短及陣上處理得唔好（全程外叠及早踩油），今場重返食胡路程，係咪真係進度掹唔到呢班，呢次跑完才作定奪。「駿蹄飛」冇晒出道早期嘅毛病（出閘曳和走規唔好），由於對上兩仗都喺外叠過蝕，先至提升唔到名次，今次轉細場，級數稍勝，如演繹得好，唔難突破。「輕輕鬆鬆」試閘唔係冇走勢，只擔心過於搶口，初出於尾段唔夠韌，不過Ｂ欄二檔可能撈到油水。「歡騰」前仗同程跑來唔差，嘗試再縮程加埋一檔，有冷味。「紅褲子」剛仗太失望。「靚得開心」唔係十二檔，必揀。

第1場  第五班（40-10分）1800米

　　心寶貝當年綁脷未好過，唔知點解用番，但前仗大長途，去到拉士200米仍有兩腳，結合埋上場跑得唔好也輸近，今次無端端返谷草，有異動。「飛躍星河」剛仗走去放頭，有違馬性，唔大敗先奇，汲取教訓後，轉場而排好位，騎者處理手法應會不同，總認為佢微超此班，再畀機會。
   
　　「馬霸龍」爆缸復出仍走得好，回到谷草點都更啱。「年年開心」剛仗濕泥影響大，回到谷草係好，但此程未必有一哩咁合適。「煇煌駒」上場有揀，贏開而對手唔覺突出，未必冇兩劑。「八達嶺」和「森淼盛」拖腳唔反對。

第2場  第四班（60-40分）2200米

　　廣友名駒勝在四班長途演出可靠，但長期負重總有影響，尚幸上場回一回，呢次再跑又可能復現威力。「神箭金剛」前仗同程出彎蝕章，一樣湧得唔錯，看來未必應付不來，隔一隔再跑，有賠率可博。

　　「健康藍莓」轉來此程效果應更佳。「瀟洒大少」前仗直路話斷就斷，所以上場唔敢睇好，之但係，有兩仗用作回氣，唔排除又重新振作。「好歡騰」落到四班終於跑番啱路程，大冷在此。「火耀雷霆」邊線馬。

第3場  第四班（60-40分）1650米

　　揀得正剛賽跑到氣管有血冇得計，以佢前次初跑同程，直路被撞而拉士仍湧得吓，一哩唔係唔得，呢次好位兼突然用阿巫，有圖謀。「吉利大哥」上賽休出兼發揮未稱職也有表現，落番柏寶手上，預期會叻得多。
   
　　「萬人迷」之前已講過多次，要分數再「質」低啲才有希望，而目前在四班也不用負太重磅，漸有殺傷力。「創新高」屬同場極少數季內贏過此程之馬，隔一隔又回到根據地，如果唔似上場慢閘，當有爭勝本錢。「勁擊」難測放頭定後追﹖「成功年代」現時氣量未足以應付一哩。「威威福星」前仗留得後也追得幾好，在1800米撞板後回到此程，未必冇本事變身。

第4場  第四班（60-40分）1200米

　　喜在心頭二檔形勢正晒，加上對上幾次跑谷草成績居然喼得好，用到阿杜，冇理由欺場。「勁勇士」及「得令先鋒」各有缺點，但又唔係冇優點，可爭欠穩。

　　「太極至尊」和「駟馬難追」俱初跑同程，速度上應以前駒較可取，檔位形勢則後駒理想。「鉅業光輝」十一檔不易克服，但目前還是短途比中程啱。「大勇」對手其實有限，如非處於極低潮期，有權上名。

第5場  第三班（80-60分）1650米

　　易搏贏兜了兩個圈回到起點，之前跑得點差唔使擺喺心，睇番入Ｑ一役，能贏「沙貝利」，而同「開心歡樂」埋Ｑ，呢次一檔而阿寶唔放手，追多舖。「驃驥王」向來演出穩定，加上回到強項，正路配腳。「超勁精神」情況與前駒近似，拖埋。

　　「重量級」加配件，估佢會跟番前，撞正今場少馬走，幾着數。「寶成智星」如果唔係碰上前駒，同埋排在其外側，處境會好得多。「超新星」剛賽塞到最後100米，根本冇騎過，但今場十二檔好難楔入。

第7場  第三班（80-60分）1650米

　　精算攻略檔好，路程正宗，就算又遇到強手，三甲一席非苛求。「寶貝王子」季內同程演出有保證，難得搵番柏寶，更加似樣。

　　「海力童」有番檔位形勢會唔同，但未必係小梁可勝任。「星際雄師」上場志在開氣，名次唔重要，有冷Ｐ機會。「得寶飛駒」邊跑邊減分，狀態則漸入局。「旅遊小子」用小楊抵消加分壓力，計死數仍有機會。「威力高」及「驚喜」向來有跟開，有賠率拖吓。

第8場  第二班（100-80分）1200米

　　金德寶及「聖法理」繼續單挑場合，估計轉來此程，後駒會略有優勢，當然前駒上場超快締速好犀利，威力未必一定因跑長200米便會被攤薄。

　「賀喜」縮落此程長期有競爭力。「鼓浪天風」目前跑谷草1200米猶比中程有能力。「高點」在夜賽最叻殿軍，且看有冇突破。「活力飛駒」十一檔難克服，就算想搶頭，快又未必夠快嘛﹖﹗