阿仙奴疲兵半場咬唔入侯城

猪拉多纳

今晚盃賽做主打，阿King最有心水係英格蘭足總盃16強重賽，上屆盟主阿仙奴作客英冠球隊侯城。兵工廠近期賽程密麻麻，焗玩輪換，經常於足總盃派副選披甲，導致初段未能入局，侯城之前7仗6次開半場和，加上抖咗幾日，以逸待勞下早段能頂住「疲兵」，半場和值得再追。

（周三凌晨3時開賽）

阿仙奴依家聯賽、歐聯、英足盃3線作戰，上周末聯賽打少個下，幾經辛苦先賽和倫敦死敵熱刺2比2，眾將疲態畢露，主帥雲格惟有採用輪換制，好似上月中足總盃16強主場對侯城，便派出伊禾比、艾利尼及基蘭基比斯等多名副選應戰，但面對撤換9名正選嘅「老虎」都咬唔入，互交白卷導致今仗要重賽。查實阿仙奴於今屆3仗足總盃，全部均開半場和，證明輪換制對該隊初段演出有一定影響。咁啱侯城亦擅長玩拉布，近7仗6次開半場和，而且自上周五凌晨於聯賽不敵伯明翰後，幾日冇比賽抖到夠，相信初段可頂住疲於奔命嘅阿仙奴，半場和乃過關穩膽。
狼隊冇包袱大盤可取

除咗盃賽外，英冠亦開快車，其中狼隊主場迎戰布里斯托城，狼隊依家位處中游，降班或爭升班附加賽暫唔輪到佢哋，冇乜心理包袱下隨時搶攻，而布城只距離護級安全線多5分，仍要搏命搶分，好大機會合演入球騷，捧大盤。最後南美自由盃第4組分組賽事，士砵亭水晶主場對颶風隊，主隊借將施薩佩雷拉上陣成疑，火力大減，颶風隊連續2場贏波兼保持清白之身，防線固若金湯，今仗贏埋唔奇。