巴塞最強主場再爆「廠」

猪拉多纳

另一場歐聯16次回合賽事，巴塞喺首回合作客輕取阿仙奴2:0，呢鋪回師主場出擊再鬥兵工廠絕對係信心保證。皆因「地上最強」唔止實力高一皮，而且佢哋歐聯主場連贏9場，堪稱最強主場，呢次對住殘陣出擊嘅兵工廠，1.61倍讓主咪走寶。（有線61及201、中央5台周四凌晨3:45直播）

魯營球場出晒名夠惡，就算面對一眾歐洲勁旅都冇有怕。連上屆在內，巴塞喺歐聯賽事豪取主場9連勝，當中近8仗有6鋪係贏2球或以上，就連拜仁、巴黎聖日耳門、羅馬等球隊，統統成為其手下敗將。況且「地上最強」對上2次主場鬥阿仙奴，都至少贏對手2粒，呢鋪對方仲要陣容不整，更容易大開殺戒。
阿仙奴殘陣焗攻等劏

阿仙奴牌面比巴塞差，最大鑊係球隊面臨傷兵潮，中場艾朗藍斯、門神施治、守將哥斯尼均有傷在身，就算後者趕及復出，缺態下對住「MSN」點會有好結果。何況阿仙奴想出線就要焗攻，後防咁就更容易出事，一旦失守隨時兵敗如山倒。睇番佢哋近6次鬥巴塞，5次至少失2粒，呢鋪想佢哋唔輸鑊甘都難咯。